Сармагчны цэцэг өвчний вирус хүнд халдварласан 200 орчим тохиолдол дэлхийн 20 гаруй улсад бүртгэгджээ

Африк тивийн гадна төдийлөн илэрч байгаагүй сармагчны цэцэг өвчний халдварын 200 орчим тохиолдол дэлхийн 20 гаруй улсад илрээд байгааг Дэлхийн Эрүүл Мэндийн Байгууллага (ДЭМБ) өчигдөр мэдээллээ.

Уг өвчин яагаад ийм өргөн хүрээнд тархах болсныг гүйцэд ойлгоогүй байгаа ч өвчний вирус мутацлагдсан гэх нотолгоо одоогоор олдоогүйг бас мэдээлсэн байна.

Сармагчны цэцэг өвчний голомт Африк тивийн баруун болон төв хэсэгт илэрдэг ба зэрлэг амьтадтай хэт ойр харилцсан тохиолдолд л хүнд халдварладаг юм. Мөн халдвар тархалт нь Африк тивээс хэтэрч байсан тохиолдол бараг байдаггүй.

Баасан гарагийн байдлаар Испани улсад халдварын нийт 98 тохиолдол, Их Британид 106 тохиолдол, Португал улсад 74 тохиолдол бүртгэгдээд байна.

Өчигдөр бас Аргентин улсад анхны тохиолдол бүртгэгдсэн нь Латин Америкийн бүс нутгийн анхны тохиолдол болжээ.

Уг тохиолдол нь саяхан Испани улсад аялаад Буэнос-Айрес хотод буцаж ирсэн эрэгтэй юм байна.

Британи, Испани, Португал, Канад, АНУ-д бүртгэгдсэн тохиолдлуудын ихэнх нь ижил хүйстэн эрэгтэйчүүдээс илэрснийг мэргэжилтнүүд баталж байгаа.

Одоогоор Британи, Герман, Канад, АНУ-ын эрдэмтэд сармагчны цэцэг өвчний эсрэг салхин цэцгийн вакцин хэрэглэх боломжийг судалж байна. Гэхдээ ДЭМБ-ын мэргэжилтэн Розамунд Люис сармагчны цэцэг нь арьс-арьс хүрэлцэх замаар халдварладаг тул амархан тархах боломжгүй, тиймээс вакцинжуулалт одоогоор шаардлагагүй гэж үзэж байгаагаа өчигдөр мэдэгджээ.