Т.Доржханд: 14 хоног ажиллаад 14 хоног амрах заалт уул уурхайн салбарынхныг хүнд байдалд оруулж байна
УИХ-ын гишүүн Т.Доржханд болон хуульч, уурхайн ажилчдын төлөөлөл Хөдөлмөрийн тухай хуулиас болж уул уурхайн салбарын ажиллах хүчний том асуудал үүсч байгаа тул энэхүү хуулийг өөрчлөх ёстой талаар мэдээлэл хийлээ.
УИХ-ын гишүүн Т.Доржханд: Монгол Улсын эдийн засаг арван жилийн хугацаанд таг гацчихсан. Өсөлтийг сүүлийн 10-15 жил түлхэж ирсэн уул уурхайн салбар зогсоод байна. Учир нь энэ салбар ажиллах хүчний дутагдалд орсон. Хөдөлмөрийн тухай хуулийг олон жилийн дараа шинэчлэн баталлаа гэж том мэдэгдлүүдийг хийсэн. Гэтэл он гарснаас хойш бодит байдал дээр уул уурхайн салбарт ажилладаг ажилчдын эрх ашиг хөндөгдөж байна. Өөрөөр хэлбэл, 14 хоног ажиллаж, 14 хоног амардаг зохицуулалтад шилжсэн. Үүний үр дүнд залуучуудын орлого буурч, бүтээн байгуулалт хийж байгаа компаниудын үйл ажиллагаа доголдож, гурван ээлжээр ажилладаг байсан бол дөрвөн ээлжээр ажилладаг болсон. Цаашлаад хилээ нээж эдийн засгийн асуудлаа шийдэх гэхээр уурхайнууд нь бүрэн хүчин чадлаараа ажилахгүй, ажилчдын дутагдалд орж байна. Шалтгаан нь шинэчлэн баталсан Хөдөлмөрийн хуулиас болсон. Уул уурхайн салбар ажиллаж чадахгүй тохиолдол долларгүй, ханш алдаж, инфляц өсөх болно. Үр дүнд нь эдийн засаг буцаж богцлогдох гээд байна. Үүний цаад талд залуучуудын орлого буурч, нийгмийн асуудал тулгарч ажилгүйдэл ядуурал үүсэх гээд байна. Тиймээс Хөдөлмөрийн тухай хуульд өөрчлөлт оруулж, уул уурхайн салбарт ажилладаг залуусын асуудлыг шийдэх хэрэгтэй байна. Мөн экспортоо хурдан шийдэхийг хүсэж байвал зөвхөн боомтын асуудлыг биш уул уурхайн салбарт ажиллах боломжийг нэмэх хэрэгтэй.